Пяскоў распавёў, што абмяркоўваюць Пуцін і Лукашэнка

На сустрэчы ў аўторак у Маскве Аляксандр Лукашэнка і Уладзімір Пуцін абмяркуюць нюансы, звязаныя з расійскім падатковым манеўрам у нафтавай сферы. Пра гэта заявіў прэс-сакратар прэзідэнта РФ Дзмітрый Пяскоў, перадае ТАСС.

"Ёсць нюансы ў падыходах, якія трэба будзе абмеркаваць", — патлумачыў прэс-сакратар Пуціна. Па яго словах, беларускі бок "востра ставіць" гэтае пытанне. 

Таксама кіраўнікі Беларусі і Расіі, дадаў Пяскоў, "правядуць зверку гадзіннікаў па ўсім комплексе двухбаковых саюзных адносін", у тым ліку абмяркуюць развіццё Саюзнай дзяржавы Беларусі і Расіі.

Як паведамлялася раней, Аляксандр Лукашэнка сёння прыляцеў у Маскву на перамовы з Уладзімірам Пуціным. Перад паездкай беларускі кіраўнік заявіў, што перамовы будуць цяжкімі.