Раман Пратасевіч выступіў на судзе з апошнім словам
Раман Пратасевіч / mlyn.by
На судзе з апошнім словам выступіў Раман Пратасевіч — былы галоўны рэдактар тг-канала NEXTA. Вытрымкі з яго прамовы з'явіліся ў дзяржаўных прапагандыстаў.
Пратасевіч заявіў, што яго выкарысталі і выкінулі. "Па сутнасці, мной проста скарысталіся. Я вінаваты ў вельмі многіх рэчах, і я сапраўды прызнаю сваю віну. Было б па-дурному і недарэчна гэта адмаўляць. Уся гэтая сітуацыя дазволіла мне зірнуць на жыццё з боку", — заявіў ён.
Таксама Пратасевіч заявіў, што прызнае палітычную паразу і папрасіў суд прызначыць пакаранне, не звязанае з пазбаўленнем волі.
Як распавядала Еўрарадыё, дзяржабвінавачанне просіць прызначыць Пратасевічу 10 гадоў пазбаўлення волі, Сцяпану Пуцілу — 20 гадоў, Яну Рудзіку — 19 гадоў.
Падчас спрэчак бакоў адвакатка папрасіла зменшыць тэрмін пакарання Пратасевічу, бо год таму ён ажаніўся і перабыванне ў турме замінае яму планаваць пашырэнне сям'і.
Трох стваральнікаў тг-канала NEXTA вінавацяць па шэрагу артыкулаў Крымінальнага кодэкса. Паводле абвінавачання, яны мелі і выконвалі "агульны план змовы з мэтай захопу дзяржаўнай улады ў Беларусі неканстытуцыйным шляхам". Пры гэтым, як сцвярджае пракуратура, "абвінавачаныя заклікалі пратэстна настроеных грамадзян здзяйсняць акты тэрарызму".
Суд па "справе NEXTA" ідзе з 16 лютага. Пуцілу і Рудзіка судзяць завочна. Пратасевіч перабывае пад хатнім арыштам. Яго ўзялі пад варту пасля таго, як 23 траўня 2021 года ў Мінску прымусова пасадзілі самалёт авіякампаніі Ryanair, на якім ён ляцеў з Афінаў у Вільню.
