Расійскі амбасадар ухваліў дзеянні беларускіх сілавікоў 25 сакавіка
Расійскі амбасадар Аляксандр Сурыкаў цалкам ухваліў дзейнасць праваахоўных органаў Беларусі падчас Дня Волі 25 сакавіка. На думку дыпламата, сілавікі дзейнічалі прафесійна і акуратна.
“Вось я цалкам ухваляю прафесіяналізм беларускіх уладаў, якія “купіравалі” магчымасць правядзення гэтага маршу пратэсту і не далі магчымасці адбыцца нават выпадковаму здарэнню, дзе магла пацярпець большасць. Не далі і ўсё! І гэта правільна. Без асаблівага хамства, без усялякіх вадамётаў, без розных газаў. Але гэта, як выявілася, недэмакратычна!” — абурыўся Сурыкаў.
На плошчах, заявіў расійскі дыпламат, дыялог немагчымы — на плошчы толькі рэвалюцыі робяцца. І параіў беларускаму грамадству свае пажаданні ўладзе даносіць праз розныя форумы ці іншыя сродкі мірнага дыялогу.
Нагадаем, 25 сакавіка ў Мінску было затрымана больш за 700 чалавек. Некаторыя з затрыманых былі збітыя. Каля 100 чалавек былі пакараныя альбо адміністрацыйным арыштам, альбо вялікімі штрафамі. 26 сакавіка акцыі пратэсту прайшлі і ў Расіі. Яны таксама былі разагнаныя сілавікамі.
