Фядуту пагражаюць судом за адмову здаць адбіткі пальцаў
Былы палітвязень кажа, што за мінулы год здаваў іх двойчы.
Адміністрацыйны пратакол склалі на Аляксандра Фядуту міліцыянты. Цяпер яму пагражае суд за адмову прайсці дактыласкапію ў трэці раз. Вось што распавёў Фядута ў жывым эфіры Еўрарадыё:
Фядута: "Яны вельмі хочуць атрымаць ад мяне адбіткі маіх пальцаў. Але справа ў тым, што я двойчы іх здаваў за мінулы год. І паколькі ў нас, паводле закону, павінна існаваць адзіная сістэма дактыласкапічнага ўліку насельніцтва, я лічу, што гэта цалкам дастаткова. Але мне кажуць, што ў іх няма адбіткаў маіх пальцаў... З іншага боку, ніхто ў аддзеле выканання пакаранняў не адмаўляе, што я сапраўды здаваў адбіткі".
Фядута здзіўляецца, чаму яго адбіткі з чацвёртага паверху будынка, з аддзела выканання пакаранняў Маскоўскага РУУС, не могуць перадаць на другі паверх, дзе знаходзіцца экспертны аддзел.
