Рэкламісты — рэкламістам: Калі вы арыентуецеся на беларускае, вы ў трэндзе!

Да 3 чэрвеня журы чацвёртага фэсту беларускамоўнай рэкламы AD.NAK! прымае працы на конкурс. Слоган сёлетняга фестывалю — “Уключы выключнасць”.

У айчыннай рэкламе ўсталявалася трывалая мода на беларускую мову. За прынцыповым Samsung і іншымі сусветнымі брэндамі, якія здаўна рэкламуюць сябе па-беларуску, нарэшце пацягнуліся нашы карпарацыі. Аксіёму: калі вы арыентуецеся на беларускае, вы ў трэндзе — засвоілі і рэкламісты, якія ўсё часцей прапануюць заказчыкам беларускамоўныя рашэнні.

“Мы бачым, што беларускамоўны маркетынг павялічвае свой уплыў, з аднаго боку, на грамадства, з іншага — на прафесійную супольнасць. Якасныя змены, якія адбыліся цягам мінулага года, паказалі, што беларускамоўная рэклама можа быць найэфектыўнейшым сродкам данясення да аўдыторыі думак стваральнікаў прадуктаў, паслуг, ідэй. І гэтая тэндэнцыя захаваецца”, ― кажа Ніна Шыдлоўская, каардынатар грамадскай кампаніі “Будзьма беларусамі”, якая з’яўляецца саарганізатарам фэсту.

Ніна Шыдлоўская

Рэклама на беларускай мове працуе таму, што людзі заўжды цягнуцца да нечага незвычайнага, лічыць стваральнік і нязменны вядучы праграмы “Відзьма-нявідзьма” Сяргей Філімонаў. Шкада, што гэтым “незвычайным” стала менавіта беларуская мова!

Сяргей Філімонаў: “Заўжды прыцягвае увагу тое, што адрозніваецца ад некага стандарту і штодзённасці. Таму, з аднаго боку, беларуская мова вабіць. Беларуская мова стала дзівам! А з іншага — у свядомасці людзей ёсць нейкае супраціўленне, непрыманне таго, што адбываецца з мовай. І таму яна таксама прыцягальная”.

Рэкламныя постэры і ролікі сёння адыходзяць на другі план. Добрая рэклама камунікуе з кожным патэнцыйным спажыўцом асобна, лічыць кіраўнік праекта Marketing.by Сяргей Скараход. Рэкламу не глядзяць, з ёй кантактуюць і ўзаемадзейнічаюць.

“І ў гэтым міксе — language is true message, бо мова — гэта аснова камунікацыі, — працягвае Сяргей Скараход. — Беларуская мова стала сродкам, які выкарыстоўваецца ў якаснай рэкламе вядомымі брэндамі (не будзем цяпер падзяляць іх на беларускія і не беларускія). Сёння кампаніі вымушаныя ствараць цікавы для людзей кантэнт, які забірае іх увагу і прымушае дзейнічаць”.

Сяргей Скараход

У меркаваннях творчага дырэктара TDI Group Сяргея Філазаповіча аптымізму крыху меней. Ён адзначае, што эксперыменты з беларускамоўнай рэкламай для большасці кампаній — адзінкавыя іміджавыя моманты. А нейкіх глабальных зменаў на рынку не адбываецца.

Сяргей Філазаповіч: “Пакуль я бачу два шляхі развіцця. Першы: міжнародныя кампаніі працягнуць сваю экспансію ў рэкламу на беларускай мове. Другі: паболее заўважных беларускіх гандлёвых марак, якія пакажуць, што мець прыгожы беларускі нэймінг і рабіць камунікацыю на беларускай мове — гэта смела і эфектыўна”.

Сяргей Філазаповіч

Сёлетняя "фішка" AD.NAK! — удзел у адукацыйнай праграме фестывалю замежных спецыялістаў з Японіі (Qanta Shimizu)  і Італіі (Alessandro Sabini), якія завітаюць у Мінск адразу пасля Cannes Lions.

Вынікі фэста будуць падведзеныя 27 чэрвеня. Больш падрабязна пра ўмовы і ўдзел у фестывалі — на афіцыйным сайце AD.NAK!  Неўзабаве ў падтрымку фестывалю кампанія “Будзьма беларусамі” прэзетную серыю ролікаў “Культура паляпаше жыццё”.