У Twitter з'явіліся кэштэгі
Сэрвіс мікраблогаў Twitter прадставіў новы сімвал — $ (кэш) і паняцце "кэштэг". Пры дапамозе кэштэгаў карыстальнікі змогуць шукаць твіты пра пэўныя кампаніі.
Паводле інфармацыі з афіцыйнага мікраблога Twitter, спалучэнне значка $ і цікера (кароткай назвы кампаніі на біржы) у твіце пераўтворыцца ў спасылку: клік па ёй будзе весці на пошук Twitter па дадзеным кэштэгу. Пакуль кэштэгі клікабельныя толькі на сайце сэрвісу і ў некаторых мабільных кліентах.
Як адзначае The Next Web, клікабельнымі становяцца толькі тыя кэштэгі, у якіх выкарыстоўваюцца дзейсныя біржавыя скарачэнні кампаній, напрыклад $GOOG ці $AAPL.
Twitter выкарыстоўвае яшчэ два спецыяльныя сімвалы ў запісах. Значок @ дазваляе ўзгадваць у твітах іншых карыстальнікаў, прычым клік па імю акаўнта пераводзіць на старонку адпаведнага профіля. Сімвал # увёў паняцце "хэштэг", і ён дазваляе задаваць тэмы твітаў. Клік па хэштэгу вядзе на старонку пошуку запісаў з такой жа тэмай.
Twitter быў прадстаўлены ў 2006 годзе. У чэрвені 2012 года, паводле дадзеных кампаніі Semiocast, аўдыторыя сэрвісу пераадолела адзнаку ў 500 мільёнаў карыстальнікаў.
