СААЗ: захворвальнасць на COVID-19 зніжаецца ва ўсім свеце, акрамя Еўропы
Да лютага колькасць смерцяў у Еўропе можа вырасці да 500 тысяч / Ілюстрацыйнае фота
Еўропа застаецца адзіным рэгіёнам свету, дзе колькасць выпадкаў захворвання і смяротнасці ад COVID-19 няўхільна расце, паведамляе Associated Press са спасылкай на Сусветную арганізацыю аховы здароўя
За апошні тыдзень смяротнасць ад COVID-19 у Еўропе вырасла на 10%. Калі ў рэгіёне не будуць прынятыя дадатковыя меры для барацьбы з каранавірусам, да лютага колькасць смерцяў можа ўзрасці да 500 тысяч, папярэдзілі ў СААЗ.
У цяперашні час у свеце зарэгістравана каля 3,1 мільёна новых выпадкаў захворвання, што прыкладна на 1% больш, чым тыдзень таму. Амаль дзве траціны выпадкаў заражэння каранавірусам прыпала на Еўропу.
СААЗ таксама паведаміла, што ў Паўночнай і Паўднёвай Амерыцы колькасць новых штотыднёвых выпадкаў захворвання зменшылася на 5%, а колькасць смерцяў скарацілася на 14%. У Паўднёва-Усходняй Азіі і Афрыцы смяротнасць ад COVID-19 знізілася прыкладна на траціну, нягледзячы на недахоп вакцын.
