Сацыёлаг Коршуноў — аб стадыях сцэнару змяншэння рэпрэсій у Беларусі
Калі можна будзе заявіць пра рэальнае змяншэнне рэпрэсій? / Euroradio
Пад самы канец 2024 года ў Беларусі на волю выйшлі 20 палітычных зняволеных. За мінулы год з калоній выйшлі 227 чалавек.
Аднак рэпрэсіі не спыняюцца, пра што кажуць справаздачы праваабаронцаў “Вясны”. Іх узровень у Беларусі застаецца высокім.
У сувязі з гэтым, сацыёлаг Генадзь Коршуноў задаецца пытаннем: абапіраючыся на якія паказчыкі, можна абгрунтавана казаць пра запаволенне, паўзу ці нават згортванне рэпрэсій у Беларусі?
Коршуноў апісаў стадыі магчымага сцэнару такіх працэсаў. Еврарадыё коратка пераказвае іх.
Стадыя 0А – стабілізацыйная
Доўгатэрміновае паляпшэнне магчыма праз стабілізацыю "поля рэпрэсій", што азначае спыненне новых рэпрэсій. Ціск на нязгодных застанецца, але сваякоў палітзняволеных могуць пакінуць у спакоі. Гэта можа адбыцца пасля выбараў і з-за жадання палегчыць нагрузку на сілавікоў.
Стадыя 0Б – эканамічная
Паралельна са спыненнем пошуку новых ворагаў тэхнакратыя рэжыму можа дамагчыся змякчэння ціску на старых праціўнікаў. Гэта можа ўключаць адмену спісаў на звальненне з дзяржпрадпрыемстваў і спыненне "чыстак" патэнцыйна нелаяльных работнікаў.
У далейшым магчыма зняцце абмежаванняў на працаўладкаванне для "палітычных" і змяншэнне нападак прапагандыстаў. Гэтыя крокі могуць быць рэалізаваны без значных канфліктаў з сілавікамі.
