Санаторый "Беларусь" у Латвіі не трапіў пад санкцыі ЕС

Санаторый "Беларусь" у латвійскай Юрмале пазбег санкцыяў Еўрасаюза — у адрозненне ад аналагічнага санаторыя ў літоўскім Друскінінкаі, піша delfi.lt. 

Як паведамлялася раней, літоўскі банк Swedbank, выконваючы рашэнне ЕС па санкцыях, заблакаваў рахункі санаторыя "Беларусь" у Друскінінкаі. Улады Літвы прымалі меры па дапамозе супрацоўнікам санаторыя: ім выплацілі аднаразовую дапамогу па звальненні. 

А санаторый "Беларусь" у Юрмале працягвае прымаць пацыентаў. Адзіная ўмова — наяўнасць адмоўнага тэсту на Covid-19. 

Паведамляецца, што юрмальскі санаторый пазбег санкцыяў дзякуючы юрыдычным нюансам. У прэс-службе МЗС Латвіі ўдакладнілі, што іх санаторый належыць Кіраўніцтву справамі прэзідэнта Беларусі, а літоўскі — Галоўнаму гаспадарчаму ўпраўленню (ГГУ) Кіраўніцтва справамі прэзідэнта. Санкцыі ж былі накладзеныя, маўляў, толькі на ГГУ.

"Трэба ўлічваць, што фінансавыя абмежаванні з-за санкцый устаноўленыя толькі ў дачыненні да канкрэтных асоб, а не дзяржавы ў цэлым", — кажуць у МЗС Латвіі.

Пры гэтым прадстаўнік Камісіі рынку фінансаў і капіталу Айя Брыкшэ сказала журналістам, што юрмальскі санаторый трапіў у поле зроку камісіі, але падрабязнасці расследавання не паведамляюцца.

Санкцыі ЕС былі ўведзеныя за масавыя фальсіфікацыі на прэзідэнцкіх выбарах і тэрор супраць мірных пратэстоўцаў. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.