Сезон абжорлівасці. Як усё паспрабаваць і не лопнуць на Новы год — парады

29/12/2023 - 10:29

Новый год / pixabay

Вы ўжо склалі меню навагодняга стала? Але відавочна не прыдумалі, як зрабіць так, каб зноў не пераесці. У нас ёсць для вас некалькі парадаў, якія зробяць раніцу 1 студзеня лягчэйшай.

Не галадайце, каб "пакінуць месца для бутэрбродзіка"

Ешце, калі вы галодныя, раіць перад святамі амерыканская фітнес-трэнерка Габрыэла Бостан.

"Распаўсюджаная памылка людзей — прапускаць прыёмы ежы ў чаканні вялікага стала", — кажа яна.

Гэта значыць, не трэба адмаўляцца ад сняданку і абеду, каб увечары ў чаканні віншаванняў ад Ціханоўскай або прагляду любімага серыяла з'есці ўсё, што гатавалі два дні. Вы будзеце адчуваць сябе дрэнна двойчы: таму што не паснедалі і таму што зноў пераелі ў Новы год.

Колькі калорый у вашым салаце?

Нью-Ёрк яшчэ 15 гадоў таму прыдумаў, як не пераядаць. Ад сетак кавярняў і рэстаранаў пачалі патрабаваць, каб яны паказвалі побач з назвай стравы яго каларыйнасць. Калі чалавек ведае, колькі менавіта калорый ён з'есць, выбраўшы гэты апетытны салат з маянэзам, то... магчыма, ён абярэ іншы.

Каб зноў не худнець "да лета", можаце пралічыць колькасць калорый у вашых любімых навагодніх стравах ужо цяпер. Напрыклад, у 100 грамах класічнага "аліўе" — каля 200 калорый.

Але не адмаўляйцеся ад бабулінага пірага!

У святочную ноч вам не патрэбныя прадукты, якія вы можаце паспрабаваць у любы дзень. Але вы дакладна зусім не павінныя адмаўляцца ад тых, якія пахнуць святам. Што гэта для вас і вашай сям'і? Бабулін пірог? Налягайце!

Гэта не апошні прыём ежы

Спакойней. Разгледзьце ежу. Адчуйце яе пах, звярніце ўвагу на колер, на форму. Сфатаграфуйце ўрэшце. Спакойная і марудлівая трапеза дапамагае не пераесці (і нават схуднець).

І не хвалюйцеся, калі не паспрабуеце ўсё! Спыніцеся на двух-трох стравах, бо будзе і заўтрашні дзень!

І хто ўсё гэта з'есць?

Пакупкі да навагодняга стала ўжо не змешчаюцца ў халадзільнік? І галасок у галаве кажа: "І хто ж усё гэта з'есць, а? Трэба даядаць!”

Ёсць ідэя: ежай можна падзяліцца! Вось, напрыклад, папулярная мінская група фудшэрынгу: проста цяпер там аддаюць вяндліну, ананасы — і так, шмат слоікаў варэння!

Дзяліцца ежай, якая можа знікнуць у сметніцы — агульнасусветнай трэнд. Ды і наогул, дзяліцца — гэта ў духу Каляд (якія вы адсвяткавалі ці яшчэ толькі збіраецеся адсвяткаваць).

У групе можна і аддаць — і ўзяць. Таму калі вам да стала якраз не хапала слоічка варэння — праверце, чым гатовыя падзяліцца мінчане.

А ў Польшчы, да прыкладу, ежу можна пакінуць у спецыяльных халадзільніках — і той, каму яна патрэбная, абавязкова яе там знойдзе.

Сезон обжорства. Как всё попробовать и не лопнуть на Новый год — советы

Як выглядаюць халадзільнікі, праз якія можна дзяліцца прадуктамі, у Польшчы / Euroradio

Выконвайце абяцанні!

А іншае амерыканскае даследаванне паказала, што мы не надта схільныя трымацца дадзеных у Новы год абяцанняў! Вось успомніце, колькі разоў вы казалі сабе, што пачняце худнець 2 студзеня?

Аказалася, што каларыйнасць адной порцыі ў сярэдняга амерыканца ў святы вырастае на 440 калорый. І ён абяцае сабе, што ў новым годзе будзе харчавацца толькі брокалі! Але што ён робіць у новым годзе? У першыя тры месяцы каларыйнасць яго порцыі вырастае яшчэ больш — на 450 калорый!

"Жаданне харчавацца больш здаровай ежай шчырае. Дастаткова паглядзець на ўсплёск пакупак здаровых прадуктаў пасля святаў. Але аказалася, што замест таго, каб купляць зялёную фасолю замест бульбы фры, мы купляем і тое, і іншае!" — рэзюмуюць журналісты Washington Post.

Вядома, мы не амерыканцы, але вучыцца на іх памылках цалкам можам! Паабяцалі сабе ніякага маянэзу 2 студзеня? Трымайцеся!

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.