Штрафы ўпрыгожваюць Цімаці Шаламе, а ў космасе разгортваецца бітва — #ІхНоравы

16/01/2025 - 16:37

#ІхНоравы / @eubanau_collage

Будучыя выбары не нясуць Беларусі ніякіх пераменаў. Іншая рэч выбары ў ЗША! Трымаем вас у курсе жахліва імклівых пераменаў праз нашы рэгулярныя агляды навін у свеце (а цяпер яшчэ і ў космасе).

Развітальная прамова Байдэна

Адыходзячы, прэзідэнт ЗША Джо Байдэн папярэдзіў пра небяспеку прыходу да ўлады алігархіі. Ён раскрытыкаваў "звышбагаты тэхналагічна-прамысловы комплекс". Мы ўсе разумеем, пра што (і пра каго) ідзе гаворка.

"Сёння ў Амерыцы фармуецца алігархія, якая валодае велізарным багаццем, уладай і уплывам, якая сапраўды пагражае ўсёй нашай дэмакратыі, нашым асноўным правам і свабодам", — сказаў на адыходзе прэзідэнт ЗША.

Якія яшчэ небяспекі назваў Байдэн у сваёй апошняй тэлевізійнай прамове з Белага дома? Змяненне клімату і дэзінфармацыю ў сацыяльных сетках. Складана спрачацца з гэтымі тэзісамі, ды і няма чаго.

Алігархі ў космасе

Алігархі ўжо пачалі бітву за космас, між іншага. Уладальнік Amazon Джэф Безас кінуў выклік Ілану Маску. У сэнсе, таксама запусціў ракету.

Два найбагацейшыя чалавекі ў свеце спаборнічаюць у камерцыйнай касмагонцы. І першы, і другі хочуць запусціць у неба як мага больш спадарожнікаў, а яшчэ прыватныя касмічныя станцыі — і даць магчымасць людзям часцей бываць на Месяцы.

Напрыклад, сярод планаў Безаса — стварэнне сеткі спадарожнікаў, якія будуць наўпрост канкураваць з інтэрнэтам ад Маска, "Старлінкам".

Але Маск павіншаваў Безаса ў пасце ў Х ("Твітар"):

— Віншую з выхадам на арбіту з першай спробы!

Ракета Безаса называецца New Glenn. Гэтае імя ёй далі ў гонар Джона Глена, першага амерыканскага астранаўта, які здзейсніў арбітальны палёт вакол Зямлі.

Грэнландыя (усё яшчэ) не прадаецца

Прэм'ер-міністр Даніі Метэ Фрэдэрыксен па тэлефоне сказала Дональду Трампу, што Грэнландыя сама павінна вырашаць сваю будучыню. На мінулым тыдні Трамп зрабіў неадназначныя заявы пра Грэнландыю і даў зразумець, што хацеў бы набыць востраў. Чаму за Грэнландыю заступаецца Данія? Бо гэты востраў — аўтаномная дацкая тэрыторыя.

Прэм'ерка Даніі сказала Трампу, што яе краіна гатовая ўзяць на сябе больш адказнасці за бяспеку ў Арктыцы (бо Трамп робіць выгляд, што Грэнландыя патрэбна яму менавіта з меркаванняў бяспекі).

Нядаўна прэм'ер-міністр Грэнландыі Мутэ Эгедэ таксама казаў Трампу, што Грэнландыя не прадаецца. Трамп уголас нічога не сказаў, але ў сваім акаўнце ў сацсетцы TruthSocial размясціў апытанне 2019 года. Паводле апытання, 68% грэнландцаў падтрымліваюць незалежнасць ад Даніі.

Мяркуецца, што рэферэндум аб незалежнасці Грэнландыі можа адбыцца, і Данія ўжо паабяцала паважаць любы вынік.

Дарэчы, Трамп ужо казаў, што хоча купіць Грэнландыю, калі мінулым разам засядаў у Белым доме. Тады прэм'ерка Даніі назвала гэтую прапанову абсурднай, і Трамп раптам рэзка адмяніў паездку ў Данію. Ох, гэта будуць цікавыя чатыры гады!

Штрафы ўпрыгожваюць Цімаці Шаламе

Кампанія пракатных ровараў Lime нібыта аштрафавала Цімаці Шаламе за паркоўку ў няправільным месцы. Шаламе спяшаўся на прэм'еру біяграфічнага фільма пра Боба Дылана. Але спяшаўся "экалагічна" — ехаў на ровары. І заехаў на ім проста на чырвоную дарожку.

Праблема ў тым, што ровар быў пракатны, ну, накшталт мінскага "калабайка". Але ровары Lime можна прыпаркаваць толькі ў спецыяльных зонах і на велапаркоўках. Чырвоная дарожка ў гэты спіс зон не ўваходзіць... так што Шаламе атрымаў штраф! Давядзецца заплаціць больш за 70 еўра, расказаў акцёр.

Гэтыя паведамленні Шаламе ўжо прынеслі яму армію новых прыхільнікаў. Ну пагадзіцеся, мілата.

Але ёсць і скептыкі. Яны не разумеюць, як Lime мог выпісаць акцёру такі штраф, бо штрафы гэтай сеткі пракатных ровараў складаюць прыкладна ад 2 да 20 фунтаў. А калі парушаеш упершыню, то штраф наогул не выпісваюць.

Вось такая вось загадка паркоўкі на чырвонай дарожцы.

(Але мы, вядома, падумалі яшчэ і пра тое, што гэта за надвор'е стаіць у іх у Лондане ў сярэдзіне студзеня, што яны могуць дазволіць сабе рассякаць на роварах!)