"Славія" падоўжыла кантракт з футбалістам, асуджаным на "хатнюю хімію"
Андрэй Салавей / Instagram / fcslavia
Клуб "Славія" падоўжыў кантракт з футбалістам Андрэем Салаўём, якога разам з жонкай асудзілі на "хатнюю хімію". Пра гэта паведамляецца ў сацсетках футбольнага клуба.
"Я ўдзячны трэнерскаму штабу і кіраўніцтву за давер і веру ў мяне, што ўзаемна. Са свайго боку працягну паляпшаць прафесійныя навыкі, каб дапамагаць камандзе дасягаць высокіх вынікаў і радаваць заўзятараў", — пракаментаваў спартовец.
Клуб не ўдакладніў, на які тэрмін разлічаны новы кантракт Салаўя.
Андрэй Салавей быў прызнаны найлепшым футбалістам 2021 года. У лістападзе 2024-га яго разам з жонкай Аксанай асудзілі, абвінаваціўшы ў грубым парушэнні грамадскага парадку (ч. 1 арт. 342 КК). Хутчэй за ўсё, нагодай быў удзел у адным з вулічных маршаў 2020 года. Ім прысудзілі па два гады "хатняй хіміі".
Дарэчы, Салавей ужо пасля вынясення прысуду двойчы гуляў за "Славію" ў матчах чэмпіянату Беларусі — 24 лістапада і 1 снежня. Агулам на яго рахунку ў мінулым сезоне 15 матчаў, у якіх ён забіў тры мячы.
