Беларусь пагадзілася атрымаць кампенсацыю за "брудную нафту" на ўмовах Расіі
Беларусь пагадзілася атрымаць кампенсацыю за "брудную нафту" на ўмовах, прапанаваных Расіяй. Гэта 15 долараў за барэль. Краіны падпісалі пратакол аб кампенсацыі.
"Расійскі бок гатовы кампенсаваць", — цытуе словы намесніка старшыні "Белнафтахіма" Уладзіміра Сізова БЕЛТА. Ён кажа, што беларускі бок атрымае ад Расеі кампенсацыю за брудную нафту, параўнальную з той, якую атрымалі іншыя краіны — Польшча, Чэхія, Славакія, Венгрыя, — 15 долараў за барэль.
Раней той жа Сізоў называў неправамоцным рашэнне "Транснафты" аб тым, што максімальны памер кампенсацыі за "брудную нафту" ў трубаправодзе "Дружбе" складзе $15 за барэль. "Па агульным юрыдычным правіле, абавязаная асоба не можа ў аднабаковым парадку вызначаць межы сваёй адказнасці перад тымі, каму яна абавязана", — казаў ён.
Таксама Уладзімір Сізоў заявіў, што ў цяперашні час ідзе праца па пацвярджэнню кампенсацыйных выплат, якія атрымае Мазырскі нафтаперапрацоўчы завод. Яго абсталяванне пацярпела ў красавіку 2019-га, калі ў нафтаправод "Дружба" трапіла няякасная нафту з Расіі. Тады беларускія НПЗ былі вымушаныя знізіць загрузку магутнасцяў і панеслі страты.
Летась расійскі бок заяўляў пра планы адпампаваць з трубаправода з Беларусі 1 млн тон нафты. Калі гэтая лічба адпавядае сапраўднасці, то наша краіна можа атрымаць не менш за 110 млн долараў. Па іншай версіі — больш за 61 млн долараў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
