Суд не апраўдаў жыхарку Гродна па справе аб бчб-лампасах на штанах

Гродзенскі абласны суд не апраўдаў жыхарку Гродна Любоў Сарлай па справе аб бчб-лампасах на штанах, паведамляе hrodna.life. 25 лютага яна спрабавала абскардзіць штраф (580 рублёў), які ёй прысудзіў суд Ленінскага раёна пасля затрымання 17 студзеня.

Як паведамляла Еўрарадыё, маці ў дэкрэце Любоў Сарлай (у яе двое дзяцей ва ўзросце двух і шасці гадоў) гуляла па горадзе і разгаварылася з жанчынай, калі іх забралі амапаўцы. Ноч яны правялі ў ізалятары часовага ўтрымання. Сілавікі пабачылі ў бел-чырвона-белых лампасах на штанах жанчыны "колер..., які парушае грамадскі парадак". Сарлай аштрафавалі, нягледзячы на яе заяву, што на штанах заводскі малюнак, лампасы яна не нашывала. Штаны суддзя Руслан Гурын вырашыў не канфіскоўваць.

У абласны суд жанчына прадаставілі здымкі з сямейнага архіву, на якіх відаць, што яны насіла штаны з бчб-лампасамі і раней. Таксама Любоў Сарлай звярнула ўвагу на супярэчнасці ў паказаннях амапаўцаў наконт часу і месца яе затрымання.

Па словах Сарлай, яна насіла згаданыя штаны і пасля затрымання. Міліцыянеры звярталі на іх увагу, але яе ўжо не затрымлівалі.

Любоў Сарлай збіраецца звярнуцца да старшыні Гродзенскага абласнога суда.