Сябру Партыі БНФ прысудзілі штраф за тое, што назваў чыноўніка "тэрарыстам"

Гарадоцкі раённы суд (Віцебская вобласць) аштрафаваў актывіста Партыі БНФ Леаніда Аўтухова. Справу на яго завялі пасля таго, як яго знялі з уліку ў цэнтры занятасці (як ён лічыць, незаконна), а Аўтухоў у адказ параўнаў у кнізе скаргаў райвыканкама начальніка раённай управы па працы, занятасці і сацыяльным забеспячэнні Пятра Прасолава з "тэрарыстам з Луганску і Данецку". Прасолаў вырашыў, што запіс абразлівы, і напісаў заяву ў міліцыю.

Суддзя Аляксандра Носава прызнала актывіста вінаватым паводле адміністрацыйнага артыкула — за "абразу службовай асобы пры выкананні службовых паўнамоцтваў асобай, не падначаленай па службе". Яна пастанавіла аштрафаваць Аўтухова на 5 мільёнаў 400 тысяч рублёў, інфармуе Радыё Свабода.

Дарэчы, Леанід Аўтухоў кажа, што сталую працу ён страціў у 2008 годзе — яго скарацілі пасля выбараў у Палату прадстаўнікоў, куды ён балатаваўся. Ад таго часу ўладкавацца на працу яму не ўдавалася, у тым ліку з дапамогай рэгіянальнага цэнтру занятасці. За апошнія гады актывіст больш за 50 разоў спрабаваў уладкавацца на працу, і ўсё безвынікова.

Фота: Fotolia, svaboda.org