Турысты з Расіі акупуюць Брэст — у гатэлях кажуць, што месцаў няма

08/05/2024 - 15:48

Горад Брэст / unsplash.com

У бліжэйшыя выхадныя ў Брэсце будуць святкаваць Дзень Перамогі. Гарадскія ўлады запрашаюць усіх ахвотных, але спантанна сарвацца ў горад на некалькі дзён у беларусаў ужо наўрад ці атрымаецца. Усе гасцініцы забітыя турыстамі з Расіі, якія прыехалі сюды паглядзець на ваенны парад і адпачыць па поўнай праграме.

Амаль усе нумары занятыя

Каб знайсці хоць адзін свабодны нумар на дваіх з 8 па 12 траўня, Еўрарадыё абтэлефанавала некалькі гатэляў.

— Месцаў у гэты перыяд няма, — кажуць у гатэлі "Буг". — Усе нумары даўно забраніравалі — святы ж... Ёсць пакоі толькі з 9-га па 10-е або з 11-га па 12-е. Двухмесны нумар будзе каштаваць 162 рублі, аднамесны — 100.

І тут, і ў іншых гатэлях, у якія нам удалося датэлефанавацца, кажуць, што большасць гасцей прыехалі з Расіі. Некаторыя браніравалі месцы за некалькі месяцаў.

Дарэчы, гасцініцу "Буг" расіяне любяць. У ёй адкрыты музейны пакой памяці Уладзіміра Высоцкага, які некалькі разоў тут спыняўся.

Месцаў няма і ў буцік-гатэлі "Статус", аформленым у стылі лофт. Самая бліжэйшая дата браніравання — 13 траўня. Суткі ў нумары на дваіх разам са сняданкам абыдуцца тут у 330 рублёў.

А вось у гасцініцы "Інтурыст" нам прапанавалі спыніцца з 8 па 10 траўня. Бюджэтны варыянт з двума асобнымі ложкамі без сняданку абыйдзецца наведвальнікам у 60 рублёў на суткі. Больш камфортны нумар з кандыцыянерам каштуе 100 рублёў.

Такім чынам, з пяці гасцініц, у якія мы патэлефанавалі, толькі ў адной знайшоўся нумар, дзе можна спыніцца на некалькі святочных дзён. Прычым гэта аказаўся самы бюджэтны варыянт. Турыстаў з Расіі цікавяць больш дарагія нумары.

А калі зняць кватэру?

На папулярным расійскім сэрвісе для браніравання гатэляў знаходзім толькі два свабодныя варыянты апартаментаў, дзе можна спыніцца з 8 па 12 траўня. Кошт за ўвесь час знаходжання па сітуацыі на 7 траўня — 2115 і 2412 рублёў. Гэта значыць 500-600 рублёў за ноч.

Мяркуючы па ўсім, гаспадары карыстаюцца наплывам расійскіх турыстаў і зарабляюць падчас святаў. Для параўнання, чатыры ночы ў тых самых нумарах у чэрвені абыдуцца гасцям у два разы танней.

Між іншым, пакуль сэрвіс прапануе больш за шэсцьдзесят самых розных варыянтаў размяшчэння ў апартаментах на першы летні месяц. Можа быць, у гэты час і варта прыехаць у Брэст, каб паблукаць па яго падворках, паглядзець, як працуе вулічны ліхтаршчык, і адчуць сапраўдную атмасферу гэтага тысячагадовага беларускага горада.