У Беларусі застаецца каля 1,5 тысячы мігрантаў, якія спадзяюцца трапіць у ЕС
Мігранты ў лагістычным цэнтры на мяжы з Польшчай / @gpkgovby
У Беларусі застаецца каля 1,5 тысячы мігрантаў, якія разлічваюць трапіць у ЕС. Гэта дадзеныя Міжнароднай арганізацыі па міграцыі. Іх падае нямецкае выданне Das Parlament.
У МАМ таксама расказалі, што 628 чалавек чакаюць свайго лёсу ў лагістычным цэнтры недалёка ад польскай мяжы. Выданне адзначае, што цэнтр мала прыдатны для пражывання людзей — "праз адсутнасць стандартаў бяспекі і гігіены".
Яшчэ некалькі тысяч мігрантаў, якія спрабавалі праз Беларусь трапіць у ЕС, цяпер знаходзяцца на тэрыторыі Польшчы: 1.670 чалавек размяшчаюцца ў закрытых памяшканнях і 1076 чалавек — у адкрытых цэнтрах. Нямецкае выданне адзначае, што польскія ўлады абмежавалі доступ валанцёраў і журналістаў да мігрантаў, таму ацаніць іх становішча там цяжка.
Віноўнікам сітуацыі ў ЕС лічаць Аляксандра Лукашэнку, нагадвае Das Parlament. З падачы беларускага лідара было арганізаванае наўмыснае перамяшчэнні бежанцаў у памежную зону і актыўная падтрымка іх незаконнай міграцыі ў ЕС. Гэта зрабілася своеасаблівым адказам на санкцыі супраць беларускага рэжыму.
У 2021 годзе не менш за 20 000 чалавек прыбылі ў ЕС праз Беларусь. 11 000 з іх нелегальна заехала ў Германію.
