У BYPOL абвясцілі вынікі аўдыту, праведзенага пасля расколу арганізацыі
Станіслаў Лупаносаў / BYPOL
Аўдыт, праведзены ў фондзе BYPOL, не выявіў злоўжыванняў і крадзяжоў. Пра гэта заявіў прадстаўнік арганізацыі Станіслаў Лупаносаў.
Ён паведаміў, што ўсе цяперашнія супрацоўнікі BYPOL прайшлі паліграф, а былым калегам выплацілі запазычанасць па заробках.
Па словах Лупаносава, незалежны аўдыт не выявіў у BYPOL злоўжыванняў і крадзяжоў. Сродкі выдаткоўваліся ў адпаведнасці з заканадаўствам і патрабаваннямі грантадаўцаў, якія пісьмова гэта пацвердзілі.
Прадстаўнік фонду паведаміў, што аўдытам займалася кампанія, якая ўваходзіць "у тройку польскіх аўдытараў, якія маюць допуск праверкі грантаў амерыканскіх донараў". Яе ўзгаднілі абодва бакі ў прысутнасці лідаркі дэмсіл Святланы Ціханоўскай і яе дарадцы Франка Вячоркі.
Пры гэтым Лупаносаў не ўдакладніў, які перыяд часу ахоплівала фінансавая праверка.
Аднак ён прыгразіў, што польскія праваахоўнікі "дадуць прававую ацэнку дзейнасці ўсіх асоб, якія распаўсюджваюць паклёп і абразы" наконт BYPOL. Сама ж арганізацыя пакідае за сабой права на абарону свайго гонару, годнасці і дзелавой рэпутацыі, у тым ліку ў судовым парадку.
Пра незалежны аўдыт загаварылі падчас расколу арганізацыі на BYPOL і BELPOL.
