У заапарку ў Віцебску памерла рысяня, якое ратавалі ў Гарадоцкім раёне
У Гарадоцкім раёне ратавалі рысяня. Знясіленая лясная кошка, якая занесена ў Чырвоную кнігу, сама прыйшла да людзей — у яе была моцна пашкоджана адна з задніх лапаў. Першую дапамогу рысяняці аказала жыхарка вёскі Верамееўка Людміла Кароткая, пасля ім сталі апекавацца супрацоўнікі віцебскага заапарку, якія прывезлі жывёлу ў абласны цэнтр на заднім сядзенні аўтамабіля (гл. відэа).
Як інфармуе тэлеканал "Беларусь 1", лясной кошцы зрабілі абязбольвальны ўкол. У заапарку для яе выдзелілі самае цёплае месца — кабінет дырэктара. Там вельмі спадзяваліся выхадзіць жывёліну. Аднак, высветлілася, што ў яе паралізаваная ўся задняя частка цела, пашкоджаная сківіца. Як паведамляе БЕЛТА, раніцай 11 студзеня рысяня памерла.
