У Глыбоцкім раёне загінуў механізатар

У Глыбоцкім раёне загінуў механізатар. Як паведамляе прэс-служба Следчага камітэта, яго прыціснула жаткай камбайна.

Трагічнае здарэнне адбылося 30 жніўня. 31-гадовы механізатар прыбіраў кукурузу, калі зламаўся камбайн. Пра гэта мужчына паведаміў кіраўніку. Па версіі СК, дырэктар сельгаспрадпрыемства загадаў чакаць у полі галоўнага інжынера. Але механізатар "вырашыў зэканоміць час і пачаў самастойна рамантаваць сельскагаспадарчую тэхніку". Падчас рамонтных работ яго і прыціснула жаткай.

У тым жа жніўні на жніве ў Чэрыкаўскім раёне Магілёўскай вобласці загінуў 59-гадовы працаўнік сельгаспрадпрыемства. Ён хацеў праверыць, наколькі запоўнены збожжам бункер, і залез на камбайн, а пасля апынуўся ў жатцы.

СК праводзіць праверку.