У Гродне з'явіцца вуліца імя польскага дэзерціра, які павесіўся ў Беларусі
![Эміль Чэчка / sb.by](/sites/default/files/styles/gallery_main/public/2023-08/czeczka-3008.jpg.webp?itok=eRFCJVXw)
Эміль Чэчка / sb.by
У цэнтры Гродна з'явіцца праезд імя Эміля Чэчкі, піша hrodna.life. Адпаведнае рашэнне прыняў 30 жніўня гарсавет.
Цяпер гэты праезд не мае назвы. Ён размешчаны ў дварах паміж вуліцай Будзёнага (дамы 46 і 48) і вуліцай Ажэшкі (дамы 47 і 49) і вядзе да будынка консульства Польшчы.
Польскі салдат Эміль Чэчка збег у Беларусь 16 снежня 2021 года і папрасіў палітычнага прытулку. У інтэрв'ю беларускім дзяржаўным СМІ ён заяўляў пра масавыя забойствы мігрантаў і валанцёраў, якія ўчынялі на мяжы польскія вайскоўцы. Таксама ён казаў, быццам сам удзельнічаў у гэтых расстрэлах. Пасля заяваў Чэчкі ўпраўленне Вярхоўнага камісара ААН па правах чалавека правяло праверку і не знайшло пахаванняў мігрантаў на польска-беларускай мяжы, пра якія казаў дэзерцір.
А 17 сакавіка 2022 года стала вядома, што Чэчку знайшлі павешаным у Мінску па месцы жыхарства. Вынікаў праверкі па факце яго смерці Следчы камітэт не публікаваў.
Пахавалі Чэчку ў Беларусі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.