У Казахстане распавялі, колькі нафты хоча купляць Беларусь

У Казахстане распавялі, колькі нафты і нафтапрадуктаў хоча купляць Беларусь. У Мінску спадзяюцца на пастаўкі ад 1 да 3,5 млн тон. Пра гэта паведаміў міністр энергетыкі Казахстана Канат Базумбаеў. "Гэта камерцыйныя перамовы", — цытуе яго словы ТАСС.

Беларусь дамовілася з Казахстанам пра пастаўкі нафты і нафтапрадуктаў 25 кастрычніка падчас візіту ў Нур-Султан Аляксандра Лукашэнкі. Тэкст пагаднення быў узгоднены і мусіў яшчэ прайсці "унутрыдзяржаўныя працэдуры". Аб'ёмы паставак не агучваліся. Лукашэнка анансаваў кансультацыі з Расіяй наконт транзіту нафты з Казахстана. У інтэрв'ю журналістам з Казахстана перад візітам ён заявіў, што Расія не прапускае нафту з Казахстана.

Беларускае кіраўніцтва шукае альтэрнатыўныя расійскаму варыянты паставак нафты ў нашу краіну. Казахстан — адзін з іх.

Міністр энергетыкі Казахстана распавёў, што на мінулым тыдні ў Маскве правёў перамовы з міністрам энергетыкі Расіі Аляксандрам Новакам. Ён паведаміў яму пра дамову з беларусамі. І рэакцыя Новака была станоўчай, сцвярджае Базумбаеў.