У наваполацкай калоніі заявілі пра здавальняючы стан Бабарыкі
Віктар Бабарыка / Еўрарадыё, архіўнае фота
Палітвязень Віктар Бабарыка так і не з'явіўся на пасяджэннях па справе сына, нягледзячы на хадайніцтва. Пра яго стан здароўя і месцазнаходжанне нічога невядома ўжо амаль два месяцы.
Паплечнікі Бабарыкі атрымалі адказ ад наваполацкай папраўчай калоніі №1. З адказу яны даведаліся наступнае:
"Адміністрацыя калоніі не перашкаджае перапісцы з Бабарыкам.
Медыцынская інфармацыя пра Бабарыку з'яўляецца медыцынскай таямніцай.
Стан здароўя Бабарыкі ацэньваецца як здавальняючы".
Напрыканцы красавіка Бабарыку са слядамі пабояў даставілі з калоніі ў наваполацкую лякарню. Пасля гэтага інфармацыя пра стан здароўя і месцазнаходжанне палітвязня перасталі паступаць. Сярод медыкаў лякарні прайшлі арышты і звальненні.
