Украіна можа ўвесці антыдэмпінгавыя пошліны на металапракат з Беларусі

Беларускі металапракат можа трапіць пад дадатковыя антыдэмпінгавыя пошліны ва Украіне. Пра гэта піша ubr.ua са спасылкай на крыніцу ў Мінэканамразвіцця Украіны.

Украінская кампанія "АрселорМіттал Крывы Рог" у ліпені 2018 года ініцыяваў антыдэмпінгавае расследаванне наконт гарачакачаных пруткоў з вугляродзістай і легіраваных сталяў, якія пастаўляюцца ва Украіну. Кампанія заяўляла пра дэмпінг з боку беларускіх і малдоўскіх прадпрыемстваў-канкурэнтаў. 

Расследаванне некалькі разоў падаўжалі, і цяпер працягнулі да 1 студзеня 2020 года. 

Украінскія СМІ пішуць, што на сёння рынак гарачакачаных пруткоў у краіне падзелены паміж трыма гульцамі — "АрселорМіттал Крывы Рог" (асноўны гулец), Беларускі металургічны завод (БМЗ) і Малдоўскі металургічны завод (ММЗ). Прычым доля імпарту з Беларусі і Малдовы на ўкраінскім рынку мінімальная — вагаецца ў раёне 5-12 %.

Калі беларускія і малдоўскія металургі апынуцца пад санкцыямі, то крыварожскае прадпрыемства стане манапалістам і будзе вызначаць кошты на рынку. Ад гэтага, як паведамляецца, пацерпяць такія некалькі ўкраінскіх прадпрыемстваў, якія купляюць прадукцыю беларускага і малдоўскага заводаў. 

Дарэчы, гэтым летам Украіна ўвяла антыдэмпінгавыя кошты на беларускі цэмент. У выніку гэты рынак для беларускіх вытворцаў зачыніўся.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.