Украіна можа легалізаваць канабіс — але не ўвесь і не для ўсіх

Змены ў заканадаўстве прапануюць дазволіць купляць, захоўваць і ўжываць медыцынскі канабіс, а дактарам — яго прызначаць. Акрамя таго, мясцовы бізнес зможа культываваць расліну (але толькі для вытворчасці прэпаратаў), а навукоўцы — вывучаць яго эфекты.

Усё мусіць быць максімальна празрыстым і адсочвацца дзяржавай: з лабараторыямі, даследаваннямі ўзораў, абавязковымі штрых-кодамі і, вядома, медыцыескімі рэцэптамі.

Падыходзіць да такога рашэння Украіна з пэўным вопытам. Так, у 2021-м урад краіны прыбраў некалькі лекаў на аснове канабісу са спісу забароненых. Гаворка пра прэпараты, якія могуць дапамагчы пацыентам, што праходзяць хіміятэрапію. Але рашэнне ў той момант было палавіністым, бо дапамагло гэта досыць вузкаму колу асоб.

Для чаго ўкраінцы змогуць выкарыстоўваць каноплі?

У загаловак законапраекта вынесенае прымяненне пры анкалагічных захворваннях і посттраўматычных стрэсавых разладах, атрыманых пасля вайны.

Для дапамогі пацыентам з анкалогіяй канабіс выкарыстоўваецца ў многіх краінах: напрыклад, ён дазваляе прыбраць млоснасць падчас праходжання хіміятэрапіі і палегчыць боль. Вопыт прымянення канопляў для лячэння посттраўматычных расстройстваў таксама ёсць у іншых краінах, у тым ліку ў ЗША, але навуковая база тут пакуль не такая шырокая.

Акрамя таго, у тлумачальнай запісцы гаворыцца, што выкарыстоўваць прэпараты могуць для некаторых неўралагічных захворванняў, у пацыентаў з ВІЧ/СНІД, для падтрымкі нарказалежных і па некаторых іншых паказаннях.

"Кайфануць" не атрымаецца

Аўтары законапраекта падкрэсліваюць: гаворка ідзе выключна пра расліны роду Cannabis. Для прадукту будзе ўсталёўвацца максімальна дапушчальны ўзровень канцэнтрацыі ТГК (тэтрагідраканабінол — адзін з асноўных канабіноідаў). Напрыклад, у краінах ЕС, якія дазволілі медыцынскае выкарыстанне канабісу, ТГК можа быць не вышэйшы за 0,2%, у Канадзе — за 0,3%. Як будзе ва Украіне — вырашыць урад.

Важна разумець, што ТГК — адзіны канабіноід, які дапускаецца да ўжывання. Іншых сярод дазволеных прэпаратаў не знайсці. Важна: гаворка ідзе пра медыцынскае выкарыстанне, гэта значыць пра вырабленыя з канабісу прэпараты з жорстка кантраляванай колькасцю актыўных рэчываў, а не пра тое, што ў аптэцы можна будзе купіць "траўку", каб "кайфануць".

Як у іншых краінах?

Медыцынскае прымяненне канабісу дазволенае ў многіх краінах, але ўсюды ёсць свае нюансы. Напрыклад, у Канадзе легалізаванае і рэкрэацыйнае выкарыстанне — адпаведна, хтосьці можа браць не ў выглядзе лекаў, а ў "натуральным". А ў суседняй Літве дазволенае медыцынскае прымяненне, але з вельмі жорсткімі ўмовамі, і па-ранейшаму могуць сур'ёзна пакараць за "звычайныя" каноплі.

Польшча пару гадоў таму таксама легалізавала медыцынскае прымяненне канабісу. Адваротная сітуацыя ў Грузіі: там курэнне "траўкі" ў прынцыпе дэкрыміналізаванае, але сістэмы медыцынскага прымянення канабісу фактычна няма.

Дзесьці можна, а ў Беларусі пасадзяць

Беларусь па-ранейшаму "славіцца" як краіна з, мабыць, самымі жорсткімі ў Еўропе антынаркатычнымі законамі. Вялікі тэрмін тут можна атрымаць і за некалькі грамаў канопляў.