Вакцына ад слановага герпесу і няправільны дранік — #ІхНоравы

15/07/2024 - 19:26

Замежныя навіны / Еўрарадыё

Беларусы любяць спрэчкі пра дранікі, падчас якіх выяўляецца, што хтосьці гатуе іх не так, як трэба. На першы погляд, гэта можа падацца смешным. З іншага боку — няправільна прыгатаванае страва здольная давесці чалавека да магілы, тады спрачацца будзе ўжо запозна.

З чаго быў прыгатаваны дранік (ці брамборак), які ледзь не забіў мужчыну на фестывалі ў Чэхіі, невядома. Цяпер ён ляжыць у рэанімацыі, і яго стан лекары называюць вельмі цяжкім.

Тым часам у адным з заапаркаў ЗША сланісе ўкалолі вакцыну, якая павінна выратаваць яе нашчадкаў ад смяротнага герпесу.

Зберагчы ад гібелі тоны спелых кавуноў, якія не могуць прадаць румынскія фермеры, падобна, зможа толькі цуд.

Але цуды здараюцца, і каб паверыць у іх, часам дастаткова проста паглядзець на неба. Ці... пачытаць наш традыцыйны агляд міжнародных навін "Іх Норавы".

Дранік-забойца

Ратавальнікі дапамаглі мужчыну, які праглынуў кавалак драніка і пачаў задыхацца. Выпадак адбыўся на фестывалі ў адной з чэшскіх вёсак, куды давялося выклікаць верталёт хуткай дапамогі.

— Сведкі здарэння спрабавалі аказаць яму першую дапамогу, але гэтыя меры не ўвянчаліся поспехам. Стан пацыента хутка пагоршыўся, ён пачаў задыхацца і страціў прытомнасць, таму спатрэбілася рэанімацыя, — расказалі ў хуткай дапамозе.

Парамедыкі падключылі пацыента да апарата штучнага дыхання і даставілі яго ў аддзяленне анестэзіялогіі і рэанімацыі бальніцы Тршынец-Сосна. Яго стан застаецца вельмі цяжкім.

Слановы герпес. Штоооо?

Ці чулі вы пра слановы герпес? Даследчыкі мяркуюць, што ён перадаецца азіяцкім сланам праз хобат. Упершыню выяўлены ў 1990 годзе і навукова апісаны ў 1999-м, сёння гэты вірус з'яўляецца адной з асноўных прычын смяротнасці маладых сланоў у няволі па ўсім свеце.

Доктар Пол Лінг, які вывучае герпес у людзей, распрацаваў спецыяльную вакцыну для гэтых жывёл.

Пробную дозу атрымала азіяцкая сланіха Тэсс у заапарку Х'юстана ў ЗША. Даследчыкі сочаць за яе здароўем, і калі ніякіх пабочных эфектаў не будзе, пазней тут плануюць прышчапіць больш асобін.

Пакуль жа навукоўцы кажуць, што хоць глабальная прыродаахоўная супольнасць і зрабіла значныя крокі ў пошуках жыццяздольнай вакцыны, неабходныя далейшая праца і час, перш чым мы атрымаем адказ на пытанне, ці эфектыўная новая вакцына, ці не.

Нікому не патрэбныя кавуны

Праз капрызы надвор'я кавуны ў румынскай вобласці Дэбулень саспелі пазней, чым звычайна. На рынак ужо паспелі завезці плады з іншых раёнаў, таму мясцовым гандлярам даводзіцца прадаваць сваю прадукцыю за капейкі.

Канкуруючы з іншымі вытворцамі, фермеры Дэбулені выкідаюць тоны спелых кавуноў, якія прадаюцца па цане ў 3-4 леі (0,6-0,8 еўра) за кілаграм.

Паводле звестак Міністэрства сельскай гаспадаркі, плошчы, засеяныя бахчавымі ў Дэбулені, складаюць 16% ад агульнай па краіне. Згодна з Румынскім статыстычным штогоднікам за 2009 год, гэтая краіна вырабляе 22,8% усіх кавуноў у Еўрапейскім Саюзе.

Серабрыстыя аблокі ў небе над Еўропай

Ува многіх краінах Еўропы людзі заўважаюць у небе серабрыстыя аблокі. З-за сонечнай актыўнасці гэтых аблокаў быць не павінна, але яны з'яўляюцца ўжо другі раз за лета.

Рэдкую прыродную з'яву назіралі ў Францыі, Латвіі, Ірландыі, Фінляндыі і нават Нарвегіі.

A stunning display of Noctilucent clouds
Over #Belfast at 3:30 am @WeatherCee @angie_weather @barrabest @LoveBallymena @annlizkelly @GillMid1 pic.twitter.com/PoK7v1qVGo
— Paul J McFarland (@PicturskewPhoto) July 13, 2024

— Серабрыстыя аблокі былі па ўсім небе. У нашай шыраце гэта сапраўдная рэдкасць, — дзеліцца ўражаннямі адна з жыхарак Венгрыі.

Ніякіх пераканаўчых прычын, чаму гэтыя аблокі ўсё ж з'яўляюцца, навукоўцы пакуль не знайшлі.

Па адной з тэорый, гэта магло адбыцца праз падводны выбух вулкана Тонга ў 2022 годзе, па іншай — праз велізарную колькасць вады, выкінутай у атмасферу ў выніку згарання ракетнага паліва.