Выбары ў КР пачаліся з магутнай DoSS-атакі. Яе адбілі
Дэбаты ў КС на тэлеканале "Белсат" / Белсат
Выбары ў Каардынацыйную раду стартавалі з магутнай DoSS-атакі, якая праводзілася з розных геаграфічных кропак.
"Каласальная яўка, якая ўжо перавышае колькасць насельніцтва Беларусі больш чым у два разы", — пажартавала кіраўніца Выбарчай камісіі Алена Прыходзька.
Праз гэта запуск галасавання давялося адкласці на дзве гадзіны.
"Нічога страшнага не адбылося, але прыйшлося падкарэктаваць сістэму галасавання", — пазней паведаміў стваральнік мабільнага дадатку Belarus ID Павел Лібер.
Платформа Belarus ID дасяжная толькі беларусам за мяжой. Беларусы ўнутры краіны могуць прагаласаваць за ўлюбёную кааліцыю ў вэб-версіі. Для галасавання патрэбны толькі беларускі пашпарт, няхай нават пратэрмінаваны. Арганізатары запэўніваюць, што дадзеныя хэшуюцца, таму ім дасылаецца толькі код. Тут — падрабязны гайд, як галасаваць.
Аддаць свой голас можна толькі за адзін спіс кандыдатаў. Спісаў (кааліцый, блокаў) — 11, у іх — 234 чалавекі. На гэты момант лідарам гонкі лічыцца "Каманда Латушкі" ў калабарацыі з "Рухам за свабоду" Губарэвіча, блок "Ягораў-Пракопаў" і "Наша справа" паліталагіні Розы Турарбекавай.
Выбары працягнуцца тры дні — да 27 траўня. Першыя вынікі арганізатары абяцаюць агучыць ужо ў панядзелак.
