Як выглядае закінутая будоўля за $3,5 мільёны ля цэнтра Мінска

Гэтая будоўля знаходзіцца на сталічнай вуліцы Валгаградскай, непадалёк ад галоўнага праспекта краіны. Даволі ціхае і ўтульнае месца па суседстве з прыватным сектарам. Цана квадратнага метра была сярэдняя, таму фірма-забудоўшчык “Валынь” без праблем знаходзіла кліентаў.

Людзі “па спрошчанай схеме” аддалі забудоўшчыку больш за 3,5 мільёны долараў. Але праз чатыры гады дом ім збудавалі толькі на 7%.

Будпляцоўка выглядае занядбанай: недаўзведзеныя сцены, паржавелыя арматурыны, горкі са смеццем і ні душы…

Сёлета 13 красавіка падманутыя дольшчыкі дамагліся распачынання крымінальнай справы па артыкуле “Раскраданне шляхам злоўжывання службовымі паўнамоцтвамі” (артыкул 210 частка 4 Крымінальнага кодэкса).

“Пацярпелі блізу 100 чалавек. Грамадзяне перадалі службовым асобам ТАА “Валынь” больш за 35 мільярдаў рублёў. Але на пачатковым этапе толькі блізу 28 мільярдаў трапілі на разліковыя рахункі”, — распавядае падрабязнасці крымінальнай справы Ілля Валозін, намеснік начальніка следчага ўпраўлення Следчага камітэта па Мінску.

Будаўніку падсунулі не тую дамову, і ён “пазычыў” начальніку 16 000 долараў

Шэсць мільярдаў, што на рахункі не трапілі, функцыянеры “Валыні” трацілі як хацелі.  У тым ліку таму, як лічыць следства, будоўлю не маглі працягваць. Яшчэ больш за два мільярды рублёў былі незаконна пазычаныя іншаму прадпрыемству. Па гэтым факце СК распачаў яшчэ адну справу — “Злоўжыванне ўладай ці службовымі паўнамоцтвамі”.

Следства працягваецца.

“Ва ўзаемадзеянні з гарадскімі ўладамі робяцца захады, якія дазволілі б скончыць будаўніцтва, каб пацярпелым была кампенсаваная шкода”, — падсумоўвае Ілля Валозін.