З Беларусі "эвакуявалі" мінчанку, асуджаную на "хімію" за "цынічнае пазіраванне"

Пра затрыманне 28-гадовай мінчанкі за відэа ад жніўня 2020-га з бел-чырвона-белым сцягам каля манумента Перамогі міліцыя паведаміла ў сакавіку 2021-га. Міліцыянеры знайшлі яе пасля таго, як яна выклала ў TikTok "відэаролік дэструктыўнага характару". Яны высветлілі, што Каванцава раней ўдзельнічала ў "несанкцыянаваных масавых мерапрыемствах".

Пасля трох дзён на Акрэсціна мінчанку адпусцілі. Пазней стала вядома пра распачатую крымінальную справу. У верасні мінулага года яе перадалі ў суд. Справу разглядаў суд Партызанскага раёна Мінска. Марыю Каванцаву прызналі вінаватай у "абразе гісторыка-культурных каштоўнасцяў".

Знаходзячыся за мяжой, Каванцава піша, што летам 2020 года "вырашыла паспрабаваць змагацца з уладай і несумленнымі выбарамі не праз пратэсты і мірныя акцыі, а праз творчую рэалізацыю". Яна вырашыла зняць "палітычны кліп пра беларускіх жанчын, якія змагаюцца з сістэмай, АМАПам і несправядлівасцю".