"З YouTube у цяперашні час мы не чакаем ніякіх цяжкасцяў" — Мінсувязі Беларусі
YouTube, ілюстрацыйнае фота / pixabay.com
Праблем з YouTube, аналагічных расійскім, у Беларусі не чакаюць. Пра гэта інфармагенцтву Sputnik заявіў першы намеснік міністра сувязі Павел Ткач.
Чыноўнік нагадаў, што ў Беларусі няма праблем з падлучэннем да Фэйсбука, якія ёсць у Расіі. У нашай краіне, падкрэслівае Ткач, створаныя цалкам незалежныя сеткі электрасувязі.
"Таму і з YouTube у цяперашні час мы не чакаем ніякіх цяжкасцяў. Хоць абсталяванне на сетках Google, аналагічнае расійскаму, у нас таксама ёсць, але тым не менш у нас такіх праблем няма", — падкрэслівае намеснік міністра.
У Расіі Фэйсбук заблакавалі пасля пачатку поўнамаштабнага ўварвання ва Украіну. У Беларусі гэтую сацсетку не блакавалі.
Нядаўна ў Расіі заявілі пра запаволенне хуткасці доступу да YouTube. Заўважныя збоі фіксаваліся 1 і 8 жніўня. Афіцыйная расійская версія — у тым, што нібыта кампанія Google не інвеставала ў абнаўленне сваіх сервераў. У Google кажуць, што не маюць дачынення да праблем.
