За апошнія тры гады за свае погляды былі затрыманыя не менш за 46 700 чалавек
За гэтыя тры гады беларускія суды выносілі пастановы аб арыштах беларусаў за іх погляды больш за 13 тысяч разоў / pixabay.com
Праваабаронцы "Вясны" да гадавіны падзей 9 жніўня сабралі вынікі трохгадовых рэпрэсій, якія зладзіў супраць беларусаў рэжым Аляксандра Лукашэнкі. Вось толькі некалькі лічбаў, якія тычацца адміністрацыйнага пераследу беларусаў. За апошнія тры гады ў Беларусі па палітычных матывах былі затрыманыя не менш за 46 700 чалавек. І гэта відавочна заніжаная лічба, таму што далёка не пра ўсе выпадкі затрыманняў праваабаронцам было вядома.
Беларускія суды за гэты час прызначылі не менш за 7 560 штрафаў на агульную суму 5 090 295 рублёў (гэта больш за 1 615 000 долараў ЗША). 13 315 разоў суддзі выносілі пастанову аб арыштах — за палітычную актыўнасць або погляды. Усяго ў ізалятарах такія беларусы правялі 134 356 сутак. Былі выпадкі, калі справы спынялі, але праваабаронцам вядома толькі аб 173-х гэткіх эпізодах.
"Цягам трох гадоў людзей кожны дзень кідаюць за краты ў нечалавечыя ўмовы без сродкаў гігіены і зменнага адзення. Людзі, якіх утрымліваюць у няволі па тры месяцы, бываюць на свежым паветры толькі тады, калі іх вязуць у РУУС складаць новы пратакол", — нагадваюць праваабаронцы пра стаўленне да затрыманых палітычных.
