Зборная Турцыі перадумала гуляць з беларускімі гандбалістамі

Зборная Турцыі перадумала гуляць з беларускімі гандбалістамі. Яна спаслалася на "праблему з залай". Беларусы ж высветлілі, што з ёй "усё было добра". Пра гэта галоўны трэнер мужчынскай зборнай Беларусі Юрый Шаўцоў расказаў у інтэрв'ю handballfast.com.

Згаданая сітуацыя адбылася ў мінулым годзе. "Толькі зараз раскрываю гэты сакрэт", — кажа Шаўцоў. Паводле яго слоў, запрашэнне прыехаць на матчы было з Турцыі, і беларусы пагадзіліся. Пра тое ж, што туркі перадумалі, даведаліся за два тыдні да прызначанай даты. Зборнай Турцыі прапанавалі прыехаць згуляць у Беларусь, але адказу ў Мінску так і не дачакаліся.

"Мы гатовы гуляць з усімі, з намі чамусьці ніхто гуляць не хоча", — гаворыць Шаўцоў. Беларускі, як і расійскі гандбол, знаходзіцца пад санкцыямі. Зборным РБ і РФ даводзіцца гуляць паміж сабой. А ў апошнім матчы, які прайшоў нядаўна ў Маскве, яны пабіліся.