Жыхара Брэста "завочна" аштрафавалі за партрэты зніклых палітыкаў

Жыхара Брэста Андруся Шарэнду аштрафавалі за партрэты зніклых палітыкаў — на 2,7 млн рублёў. Яго прызналі вінаватым у расклейцы інфармацыйных плакатаў.

Нагадаем, што ўжо традыцыйная за апошнія месяцы акцыя салідарнасці адбылася 16 студзеня. У шматлюдных месцах Брэста з'явіліся партрэты Юрыя Захаранкі, Віктара Ганчара і Дзмітрыя Завадскага. У той жа дзень у Брэсце быў затрыманы грамадскі актывіст Андрусь Шарэнда. Маладога чалавека літаральна "знялі" з тралейбуса супрацоўнікі АМАПа.

Спачатку на актывіста быў складзены пратакол за "дробнае хуліганства". Ён нібыта аблаяў матам тых самых амапаўцаў. Пасля быў складзены другі пратакол, ужо непасрэдна за расклейку плакатаў — "Парушэнне правілаў добраўпарадкавання і ўтрымання населеных пунктаў".

Аднак ці з’яўляецца расклейка плакатаў у прызначаных для гэтага месцах (хоць і без дазволу) забруджваннем тэрыторыі? Прававую ацэнку па абодвух пратаколах у гэтай справе спрабуем атрымаць у праваабаронцы Рамана Кісляка.

“Распаўсюд інфармацыі ўспрымаецца як парушэнне правілаў добраўпарадкавання. То бок улады выкарыстоўваюць фармальныя нагоды, каб перашкодзіць распаўсюду інфармацыі і выказванню свайго меркавання. Фармальна падыходзіць усё што заўгодна. Што да дробнага хуліганства, то тут безумоўна сфальсіфікаваная справа, каб яго (Шарэнду — Еўрарадыё) затрымаць і падвергнуць спагнанню”.

Па абвінавачанні ў дробным хуліганстве Андруся Шарэнду хацелі асудзіць праз некалькі гадзін пасля затрымання, аднак яго вызвалілі з залы суда. Складу правапарушэння ў дзеяннях актывіста суддзя не пабачыла, а адміністрацыйны пратакол загадала вярнуць у міліцыю на дапрацоўку.

Разгляд справы па другім артыкуле прайшоў 23 студзеня. Адміністрацыйная камісія Маскоўскага раёна Брэста прызнала Шарэнду вінаватым. У каментары Еўрарадыё Андрусь Шарэнда кажа, што даведаўся пра гэта толькі 27 студзеня з ліста, які атрымаў па пошце.

"Я быў асуджаны гэтай камісіяй на 15 базавых велічынь штрафу па артыкуле 21.14 нібыта праз забруджанне тэрыторыі і гэтак далей. З пратаколам я не пагадзіўся, але адміністрацыйная камісія на гэта не звярнула ўвагі і спакойна без маёй прысутнасці асудзіла мяне".

Андрусь Шарэнда з рашэннем камісіі не згодны, але пакуль не вырашыў, ці будзе яго абскарджваць. Малады чалавек упэўнены, што наступныя інстанцыі пакінуць прысуд без зменаў.

Спецыяльна для праграмы Кардыяграма