Жыхарка Літвы атрымала смс-паведамленне "Вярніцеся назад у Мінск!"
Тэкст смс-паведамлення / delfi.lt
Грамадзянка Літвы перасекла мяжу Польшчы і атрымала дзіўнае смс-паведамленне, якое змяшчае патрабаванне для нелегалаў — "Вярніцеся назад у Мінск!", паведамляе Delfi.
Паведамленне напісанае на англійскай мове: "Мяжа з Польшчай закрытая. Беларускія ўлады вас падманулі. Вярніцеся назад у Мінск! Не прымайце таблетак, якія вам даюць беларускія вайскоўцы".
Да смс далучаная спасылка, якая вядзе на спецыяльны сайт для нелегальных мігрантаў. Тут іх папярэджваюць, што польска-беларуская мяжа ахоўваецца, і за яе нелегальны пераход пагражае турма. Мігрантам рэкамендуюць не ўдзельнічаць у нелегальных акцыях па пераходзе мяжы, якія арганізуе Беларусь.
Як паведамляла раней Еўрарадыё, у Літве ў рэанімацыю трапілі двое дзяцей нелегальных мігрантаў, якім на тэрыторыі Беларусі далі таблеткі людзі ў масках.
Сёлета ў Літву з Беларусі прыбыло амаль 4200 нелегальных мігрантаў. Пасля таго як Літва закрыла межы, нелегалы накіраваліся ў Польшчу і Латвію.
