Асацыяцыя паштовых аператараў выключыла Беларусь са сваіх сяброў
"Белпошта"
Асацыяцыя еўрапейскіх дзяржаўных паштовых аператараў PostEurop канчаткова выключыла са сваіх сяброў Беларусь і Расію. Такое рашэнне Генеральная асамблея PostEurop прыняла 16 кастрычніка ў Бялградзе, піша ўкраінскае выданне LIGA.net са спасылкай на прэс-службу "Укрпошты". За ўсю гісторыю асацыяцыі гэта першы выпадак прыпынення сяброўства для асобных краін.
"Санкцыі, за якія сёння прагаласавалі паштовыя аператары Еўропы, канчаткова пазбаўляюць Расію і Беларусь магчымасці ўдзельнічаць у міжнародных паштовых ініцыятывах PostEurop, у прыватнасці, супрацоўніцтва ў сферах лагістыкі і мытні", — патлумачыла Укрпошта.
Беларусь часам удзельнічала і ў конкурсах асацыяцыі. Напрыклад, у 2021 годзе ў конкурсе PostEurop удзельнічала беларуская паштовая марка з хамяком.
Сяброўства дзяржаўных паштовых аператараў РФ і Беларусі было прыпыненае ў 2022 годзе з прычыны ваеннай агрэсіі Расіі супраць Украіны і падоўжанае ў 2023 годзе.
