Байдэн папярэдзіў РФ аб сур'ёзных наступствах, калі яна ўварвецца ва Украіну

Прэзідэнт ЗША Джо Байдэн папярэдзіў кіраўніка Расіі Уладзіміра Пуціна аб сур'ёзных наступствах, калі РФ "уварваецца ва Украіну". Пра гэта гаворыцца ў заяве прэс-сакратара Белага дома Джэн Псакі, якая была распаўсюджана па выніках тэлефоннай размовы Байдэна і Пуціна.

Размова адбылася напярэдадні ўвечары па просьбе расійскага боку. Гутарка доўжылася 50 хвілін. Тон размовы быў сур'ёзным і змястоўным, адзначылі ў Белым Доме.

Са слоў Псакі, Джо Байдэн заявіў, што існуе два шляхі развіцця сітуацыі, якія залежаць ад дзеянняў Расіі.

"Адзін з іх — шлях дыпламатыі, які вядзе да дээскалацыі сітуацыі, а другі — шлях, які ў большай ступені арыентаваны на стрымліванне, уключаючы сур'ёзныя выдаткі і наступствы, калі Расія вырашыць працягнуць далейшае ўварванне ва Украіну", — гаворыцца ў паведамленні прэс-сакратара Белага дома.

У другім выпадку гаворка можа ісці аб павелічэнні колькасці сіл НАТА ў краінах-саюзніках, а таксама аказанні дадатковай дапамогі Украіне.

У Крамлі, каментуючы размову, адзначылі, што яна  была карыснай для абодвух бакоў. У Маскве яе разглядаюць як падрыхтоўку да перамоваў "па прадастаўленні юрыдычных гарантый забеспячэння бяспекі Расіі", паведамляе ТАСС. Пуцін чакае ад ЗША прававых гарантый, якія выключалі б "прасоўванне NATO на ўсход і размяшчэнне сістэм ўзбраення ў непасрэднай блізкасці ад расійскіх межаў".

Абмеркаванне гэтых пытанняў будзе працягнута падчас двухбаковых перамоваў у Жэневе 9-10 студзеня, затым у рамках Савета Расія-NATO ў Брусэлі 12 студзеня, і далей 13 студзеня падчас дыскусіі ў АБСЕ.