Беларуска Ірына Слюсар, якую шукалі ў Грузіі, загінула

У Грузіі скончыліся пошукі беларускі Ірыны Слюсар — 27 лютага знойдзена яе цела, паведамляюць валанцёры. Трагедыя здарылася ўдзень 22 лютага ў горадзе Кабулеці. Слюсар і яе сяброўка кінуліся ратаваць сабаку, якога накрыла хваляй, і іх пачало адносіць у мора. Сяброўка атрымала траўму галавы, яе выкінула на бераг, а Ірыну Слюсар шукалі некалькі дзён.

Слюсар — ураджэнка Жодзіна. Яна скончыла Беларускую дзяржаўную акадэмію мастацтваў, займалася тэатральнай рэжысурай, з'яўлялася саўладальніцай тэатра для дзяцей "Лось і светлячок" у Грузіі.