Браты Багдановічы на Еўрапейскіх гульнях у Баку заваявалі золата

Браты-канаісты Андрэй і Аляксандр Багдановічы заваявалі першае золата для зборнай Беларусі на Еўрапейскіх гульнях у Баку. Як паведамляе БЕЛТА, беларускія весляры выйгралі фінальны заезд у каноэ-двойцы на дыстанцыі 1000 м. Яны паказалі вынік 3 хвіліны 34,412 секунды.

Другое месца дасталося расіянам Іллі Пярвухіну і Аляксею Каравашкаву (3 хв. 34,453 сек.). Бронза — у немцаў Петэра Крэчмера і Міхаэля Мюлера (3 хв. 34,982 сек.).

Браты Багдановічы прынеслі першы залаты медаль беларускай зборнай на першых Еўрапейскіх гульнях у Баку.

Таксама ў панядзелак бронзавы медаль заваяваў беларускі экіпаж байдаркі-двойкі на дыстанцыі ў 1000 м — Віталь Бялько і Раман Петрушэнка.

У спаборніцтве адзіночак на байдарках і каноэ ў панядзелак беларусы не падняліся вышэй за пятае месца.

Агулам на Еўрапейскіх гульнях у веславанні на байдарках і каноэ будуць разыгрывацца 15 камплектаў узнагарод. Пяць з іх сёння, а астатнія — 16 чэрвеня.

Фота: БЕЛТА