Былая зняволеная распавяла пра сустрэчу на Акрэсціна з сям'ёй Лівянта

У ІЧУ на Акрэсціна вядомы рэпетытар Яўген Лівянт чытаў у камеры лекцыі. Гэта распавяла праваабаронцам Былая зняволеная, якая ў снежні 2022 года правяла ў суседняй камеры 15 сутак. З ёй спачатку сядзела дачка Лівянта Ганна, а затым яго жонка — Юлія.

"Мы часам чулі, як Яўген чытаў лекцыі ў камеры. Але гэта яшчэ калі Юля была ў камеры. Яна распавядала, што спачатку затрымалі яе і мужа, а дачка і яе муж Мікіта прыехалі з Польшчы на Дзень нараджэння і навагоднія святы", — распавяла праваабаронцам дзяўчына.

Калі затрымалі бацькоў, Аня і Мікіта паехалі ў РУУС перадаць лекі — у Юліі Лівянт цукровы дыябет. Яна павінна пастаянна прымаць таблеткі. На Акрэсціна ёй было складана яшчэ і праз харчаванне. Ёй нельга ёсць бульбу, хлеб, цукар. У выніку заставаліся толькі мясцовыя кашы.

Дзяўчына распавяла, што калі ў камеры яшчэ была дачка Лівянта, малады супрацоўнік адкрыў кармушкі ў іх камеры і ў мужчынскай камеры насупраць. У выніку Ганна Лівянт змагла хоць бы жэстамі пагутарыць з бацькам. “Яна паказала колькі ёй сутак далі, а Яўген — колькі яму. Аня паказала, што мамы з ёй няма. Потым Яўген паказаў кніжку Стывена Кінга", — распавядае дзяўчына.

Яна сядзела таксама разам са спартсменкай Надзеяй Астапчук і праваабаронцай Настай Лойка.

"На момант нашай сустрэчы Анастасія не ведала, што адбываецца. Для яе не прымалі перадачы і некаторыя лекі важныя, гарманальныя прэпараты ў тым ліку. Як высветлілася, лекі, якія перадаюцца затрыманым, на Акрэсціна часта "губляюцца", — распавядае дзяўчына. Паводле яе слоў, да таго моманту Наста знаходзілася на Акрэсціна два месяцы, моцна схуднела, але "праводзіла з усімі юрыдычныя кансультацыі".

І сям'я Лівянт, і Наста Лойка прызнаныя палітвязнямі.