Былы муж Ціманоўскай прыйшоў на эфір да Азаронка

Арсень Зданевіч, былы муж бягухі Крысціны Ціманоўскай, схадзіў на праграму да прапагандыста Рыгора Азаронка. Гэта адбылося пасля таго, як Следчы камітэт заявіў аб праверцы, пачатай у дачыненні да Зданевіча.

Як распавядала Еўрарадыё, Ціманоўская пабачыла ў сацсетках, што яе былы муж вярнуўся ў Беларусь, і затэгала ў допісе МУС і Памежны камітэт. Яна адзначыла, што Зданевіч хадзіў з нацыянальнай бел-чырвона-белай сімволікай. Спартоўка вінаваціць экс-мужа ў махлярстве. Маўляў, ён узяў у яе больш за 30 тысяч долараў, каб прыгнаць дзве машыны. У выніку яна засталася і без грошай і без аўто.

У эфіры Зданевіч заявіў, што заблакаваў былую жонку ва ўсіх сацсетках, каб засцерагчыся ад кантактаў з ёй.

Арсень сказаў, што пасля вяртання ў Беларусь прагаласаваў за Лукашэнку. Хоць пасля жніўня-2020 ён падпісаў ліст свабодных спартоўцаў з патрабаваннем сумленных выбараў.

Заяву Следчага камітэта аб праверцы ён пракаментаваў наступным чынам: "Разумею, чаму ўсё гэта. Мая былая жонка любіць пакрычаць, зрабіць выгляд, што я тут, я супраць усіх — глядзіце. А я быў як цацка — сюды-туды".

Ён дадаў, што пры вяртанні ў яго не было праблем на мяжы і што ён гатовы супрацоўнічаць са следствам. Арсень заявіў, што ў 2020-м на мітынгі не хадзіў. А фота з нацыянальнай сімволікай было зробленае нібыта на першых спаборніцтвах у Польшчы, куды дапусцілі выступаць Ціманоўскую.

Пра абвінавачанні ў махлярстве Зданевіч нічога не сказаў, заявіўшы толькі, што Ціманоўская залгалася.