"Цягнік Лукашэнкі ў Гаагу рушыў сёння" — Павел Латушка
Падчас прэс-канферэнцыі ў Гаазе / прэс-служба НАУ
У Нідэрландах Павел Латушка і Святлана Ціханоўская разам з прадстаўнікамі ўраду Літвы далі прэс-канферэнцыю пра злачынствы рэжыму Лукашэнкі. Раней адпаведныя матэрыялы былі перададзеныя ў Міжнародны крымінальны суд ад імя ўрада Літвы.
"Для Лукашэнкі няма шляху назад. Запушчаны працэс правасуддзя незваротны. Мы заклікаем усе дэмакратычныя краіны далучыцца і падтрымаць працэс аднаўлення справядлівасці, які быў запушчаны Літвой. І распачаць аналагічныя дзеянні, каб надаць максімальную хуткасць цягніку "Мінск — Гаага", — заявіў падчас прэс-канферэнцыі Павел Латушка.
Як распавядала Еўрарадыё, дакументы па злачынствах рэжыму Лукашэнкі супраць чалавечнасці былі перададзеныя 30 верасня ў Міжнародны крымінальны суд у рамках Рымскага статуту. Яны адбываліся не толькі на тэрыторыі Беларусі, таму трапляюць пад міжнародную юрысдыкцыю.
