Двое судзяў Эканамічнага суда Мінска атрымалі вялікія турэмныя тэрміны

Двое суддзяў Эканамічнага суда горада Мінска атрымалі вялікія турэмныя тэрміны за карупцыйныя злачынствы. Як перадае БЕЛТА, суддзя Юрый Грушэцкі атрымаў 11 гадоў пазбаўлення волі ў калоніі ўзмоцненага рэжыму з канфіскацыяй маёмасці і пазбаўленнем права займаць пасады ў праваахоўных органаў і судах цягам пяць год. Яго прызналі вінаватым у махлярстве, дачы і атрыманні хабару.

Суддзя Алена Мельнікава прызнаная вінаватай у атрыманні хабару. Яе асудзілі на 13 гадоў пазбаўлення волі з канфіскацыяй маёмасці. Цягам 5 год яна не зможа працаваць у праваахоўных органах і судах і будзе адбываць пакаранне ў калоніі агульнага рэжыму.

Па справе праходзілі яшчэ чацвёра фігурантаў, якія атрымалі меншыя тэрміны. Віктар Вінцкевіч атрымаў 3,5 года калоніі ўзмоцненага рэжыму з канфіскацыяй маёмасці, Алена Халецкая — 3,5 гады агульнага рэжыму з канфіскацыяй. Андрэй Рыкун атрымаў 3 гады хатняй “хіміі”, Наталля Грэцкая — такое ж пакаранне на 2 гады.

Прысуды не падлягаюць абскарджанню.