Дзе свінні? Чаму беларускія фермы пусцеюць

— Пару месяцаў таму хтосьці з Міністэрства сельскай гаспадаркі выхваляўся, што аднаўляе чырвоную пароду кароў. Хоць насамрэч яны закупляюць цялушак у Даніі. І як быццам бы гэта "аднаўленне беларускай пароды". Без папаўнення семяннога пагалоўя гэта будзе простая карова, якая будзе даваць 5-6 тысяч літраў малака на год, а не 20 тысяч, як у Даніі.

Лысянкоў кажа, што ўся сельская гаспадарка ў Беларусі трымалася на імпарце: селекцыя, ветпрэпараты, кармавыя дабаўкі, тэхналогіі. Эксперт перакананы, што з кожным годам сітуацыя будзе толькі пагаршацца.

"Спецыялістаў няма, працаваць няма каму"

Другі фактар — адток беларусаў за мяжу.

— У сельскагаспадарчай галіне, як і ў многіх іншых у Беларусі, таксама мала людзей. Гэтая сфера вельмі непрывабная. Якія б аграгарадкі ні будавалі і колькі б жылля ні давалі, людзі не хочуць туды ісці. 

Самы наглядны прыклад — сельскагаспадарчыя ВНУ: з якімі баламі туды ідуць людзі? Каб паступіць на заатэхніка, дастаткова самага нізкага бала на іспытах. І нават з гэтымі крытэрамі ў іх недабор.

Спецыялістаў няма, працаваць няма каму — пагалоўе жывёлы скарачаецца.

Цэлыя фермы стаяць пустыя, руйнуюцца. Нават пад Мінскам. А калі далей ад'ехаць — там наогул дзясяткі іх стаяць, якія проста развальваюцца.

"Калгасы стануць яшчэ бяднейшымі"

Зараз Беларусь — самая адсталая краіна ў рэгіёне, у тым ліку ў сферы сельскай гаспадаркі, перакананы Лысянкоў.

— Эфектыўнасць вытворчасці будзе падаць і далей, калі не будзе зменаў. Калгасы яшчэ 40 гадоў таму былі неэфектыўнымі, і з таго часу нічога не змянілася. Беларусы наўрад ці будуць галадаць, але на экспарт будзе ісці вельмі мала прадукцыі. З гадамі будзе горш і горш.

А паколькі цэны ў Беларусі рэгулююцца, то, калі сабекошт малака будзе 10 рублёў, прадаваць яго ўсё роўна прымусяць па 2-3 рублі. У выніку калгасы стануць яшчэ бяднейшымі.

"Цяперашні ўзровень — гэта столь такога спосабу гаспадарання"

Зніжэнне колькасці насельніцтва ў вёсках можа быць прычынай скарачэння жывёлы ў Беларусі, лічыць палітык і эканамічны блогер Аляксандр Кныровіч.

— За гэтыя гады дынаміка дамавых гаспадарак адназначна мінусавая. Па каровах — практычна на траціну. І дынаміка ў хатніх гаспадарках адлюстроўвае скарачэнне насельніцтва ў вёсках. За 24 гады каля мільёна недзе сцерлася, пры тым што колькасць гарадскога насельніцтва амаль не змянілася. Людзі ў вёсцы старэюць і трымаюць менш жыўнасці, у тым ліку кароў, авечак, коз, коней.