Гадзіннік за $45 тысяч на адрамантаванай Камсамольскай не працуе

Гадзіннік за 96 тысяч рублёў, устаноўлены на скрыжаванні вуліцы Камсамольскай і Рэвалюцыйнай у Мінску, не працуе.

"Я штодня праходжу міма і заўважыў, што стрэлкі не рухаюцца ўжо мінімум другі дзень. Я ведаю, што на гадзіннік патрацілі нейкія сотні тысяч, ці то рублёў, ці то еўра. А тут, мала таго, што механізм у іх — бутафорыя, дык яшчэ і не працуе", — распавядае Еўрарадыё Міхаіл, які працуе ў офісе на вуліцы Камсамольскай.

Г​алоўны інжынер "Мінскай спадчыны" Міхаіл Жых апынуўся не ў курсе паломкі:

Еўрарадыё: Міхаіл Іосіфавіч, што здарылася з гадзіннікам на скрыжаванні Камсамольскай і Рэвалюцыйнай? Ён ўжо некалькі дзён не працуе.

(Доўгая паўза)

Міхаіл Жых: Вось вы заўважылі, а мы і не ведалі. Будзем разбірацца.

Офіс "Мінскай спадчыны" знаходзіцца менш як у 500 метрах ад скрыжавання, на якім стаіць непрацуючы гадзіннік.

На рэканструкцыю гістарычнага цэнтра Мінска было выдаткавана каля 2,3 мільёна рублёў. І гэта толькі па тых тэндарах на дзяржзакупкі, якія знайшлі журналісты. Праз некалькі дзён пасля таго, як вуліцы адкрылі для мінакоў, на іх — якраз у тым месцы, дзе стаіць гадзіннік — здарыўся патоп.

Таксама мінчукоў абурылі больш за 600 слупкоў і ланцугі, якімі абгарадзілі пешаходную зону, указальнікі з памылкамі ў назвах, нятанныя гранітныя кветачніцы, некаторыя з якіх стаялі проста на газонах, і ліхтарныя слупы, пастаўленыя па два замест аднаго.