Гамяльчанку, якая смяялася на "пакаянным відэа", аштрафавалі і адпусцілі
Юлія Гансіеўская / Скрыншот
Шматдзетную маці з Гомеля Юлію Гансіеўскую, якая смяялася падчас запісу "пакаяннага відэа" ў ГУБАЗіКу, аштрафавалі і адпусцілі. Пра гэта праваабаронцам з "Вясны" распавёў яе муж.
Па словах мужчыны, сілавікі "нічога не даказалі". Жанчыну пакаралі штрафам у 15 базавых велічыняў (480 рублёў) за "падпіску на тэлеграм-каналы". Гансіеўскую вызвалілі пасля суда.
Папярэдне паведамлялася, што Юлію Гансіеўскую затрымалі за перадачу забароненым у Беларусі тэлеграм-каналам інфармацыі аб перамяшчэнні расійскіх войскаў па Гомельскай вобласці. Відэа, на якім жанчына смяецца ў адказ на традыцыйныя пытанні сілавікоў, скарыла сацсеткі. Напрыклад, на пытанне: "За што вас даставілі сюды?" Ганісеўская адказала: "За шкірку!". Зламаць яе для запісу роліка ў звычайным фармаце, здаецца, так і не атрымалася.
