Ганцавіцкі вучань на школьнай лінейцы страціў прытомнасць, упаў і зламаў сківіцы
Апошні званок у Ганцавіцкай гінмазіі / gancevichi.edu.by, ілюстрацыйнае фота
13-гадовы школьнік з Ганцавіцкага раёна зламаў сківіцы і страціў некалькі зубоў на школьнай лінейцы, піша "Ганцавіцкі час".
Няшчасны выпадак адбыўся ў Ганцавіцкай сярэдняй школе 25 траўня. У гэты дзень там праходзіла лінейка, прысвечаная заканчэнню школьнага года.
Лінейка пачалася каля дзявятай гадзіны раніцы. Не прайшло і паўгадзіны, як хлопчык у другім шэрагу паваліўся тварам наніз і стукнуўся аб бетон. У выніку ён пераламаў сківіцы і выбіў чатыры зубы.
Хуткая дапамога даставіла школьніка ў Ганцавіцкую лякарню, адтуль яго завезлі ў Баранавічы. Аднак траўма была настолькі сур'ёзнай, што хлопчыка адправілі ў аддзяленне сківічна-тварнай хірургіі ў Брэст. Там яму зрабілі аперацыю, паставілі імпланты.
Выпісалі падлетка 2 чэрвеня пад назіранне ганцавіцкіх стаматолагаў.
