ГУР ліквідавала расійскага пілота, які бамбіў мірных жыхароў ва Украіне
Дзмітрый Галянкоў / unian.net
Галоўнае ўпраўленне разведкі Мінабароны Украіны заявіла пра забойства расійскага пілота Дзмітрыя Галянкова, які бамбіў мірных жыхароў ва Украіне. Яго цела знайшлі раніцай 20 кастрычніка пад Бранскам з "множнымі траўмамі галавы, прычыненымі, імаверна, малатком". У пацверджанне публікуюцца здымкі і відэа.
Галянкоў служыў у 52-м цяжкім бамбавальным авіяпалку, займаў пасаду начальніка штабу авіяцыйнай эскадрыллі. ГУР называе яго ваенным злачынцам, датычным да ракетных удараў па ўкраінскіх грамадзянскіх аб'ектах, у прыватнасці, па гандлёвым цэнтры "Амстор" у Кременчузе Палтаўскай вобласці 27 чэрвеня 2022-га. Тады загінулі 22 чалавекі, дзясяткі былі параненыя. Дзмітрыя Галянкова лічаць адказным і за ракетны ўдар па жылым доме ў Дняпры 14 студзеня 2023 года. Тады загінулі 46 мірных жыхароў, а сярод іх — 6 дзяцей.
Расійскі бок паведамленне ГУР пакуль не каментаваў.
