КДБ пацвердзіў: журналіст Дзяніс Івашын абвінавачваецца ў "здрадзе дзяржаве"
Журналіста Дзяніса Івашына падазраюць у здрадзе дзяржаве, вынікае з адказу КДБ жонцы затрыманага Вользе Івашынай.
Івашына затрымалі 12 сакавіка. У ягонай кватэры, на лецішчы, а таксама ў кватэры ягонай бабулі ўчынілі ператрусы на падставе падазрэнняў у парушэнні арт. 365 КК РБ — ўмяшанні ў дзейнасць супрацоўніка органаў унутраных спраў. Максімальная санкцыя па гэтым артыкуле — тры гады пазбаўлення волі.
Новы артыкул, па якім абвінавачваюць журналіста, прадугледжвае іншыя меры. Максімальны тэрмін пазбаўлення волі за “здраду дзяржаве” — 15 год.
Івашын — рэдактар беларускай службы міжнароднай супольнасці InformNapalm, якая займаецца расследваннямі, звязанымі з падзеямі 2014 года ва Украіне. За тыдзень да свайго затрымання Івашын апублікаваў матэрыял, у якім распавядаў, дзе цяпер служаць былыя "беркутаўцы" з Украіны.
