Кіпрская кампанія выкупіць у маскоўскай акцыі "Космас ТБ"
Маскоўская тэлекамунікацыйная карпарацыя, якая працуе пад брэндам «Акадо», прадасць сваю долю ў беларускім інтэрнэт-правайдары "Космас ТБ".
Як піша расійскае выданне "КоммерсантЪ", пакупніком выступае кіпрская International Telvell (CIS) Ltd. Ёй належыць 50% у "Космас ТБ".
Здзелка ацэньваецца прыкладна на 300 мільёнаў расійскіх рублёў, або больш за 4 мільёны долараў.
У маскоўскай карпарацыі сваё рашэнне патлумачылі "аптымізацыяй партфеля актываў".
Эксперты мяркуюць, што "Акада" сыходзіць з Беларусі праз патрабаванні патэнцыйных інвестараў: беларускім "Космасам" цікавяцца структуры "Растэха" і правайдэр "ЭР-Тэлекам".
"Акада" купіла сваю долю ў "Космас ТБ" у 2006 годзе.
