Літва плануе павялічыць колькасць памежнікаў на мяжы з Беларуссю
Літоўскі памежнік / euobserver.com
Сітуацыя на межах Літвы з Беларуссю і Расіяй напружаная, але стабільная. Так ацаніў яе кіраўнік Службы аховы дзяржмяжы Літвы Рустам Любаеў пасля сустрэчы з прэзідэнтам краіны Гітанасам Наўседам, перадае delfi.lt.
Ён дадаў, што прысутнасць вагнераўцаў у Беларусі стварае высокую імавернасць правакацый. І запэўніў, што ў самы кароткі тэрмін Літва гатовая размясціць на мяжы дадатковыя сілы.
"Мы з МУС цяпер разглядаем магчымасць павелічэння нашых магутнасцяў на мяжы з Беларуссю. Былі прыняты адпаведныя рашэнні. У бліжэйшы час мы плануем павялічыць наш кантынгент ля мяжы з Беларуссю", — заявіў ён.
Як распавядала Еўрарадыё, ахову мяжы з Беларуссю таксама пачала ўзмацняць і Польшча.
Любаеў згадаў нядаўна пачатыя вучэнні беларускага войска на Гродзеншчыне, але падкрэсліў, што вялікай пагрозы ад іх не бачыць: "Вучэнні праходзяць, але іх маштабы невялікія. Вялікай пагрозы на сённяшні дзень няма".
